मां फळ्यांम ला वागा फेद्डोड निल्चुतुड्या. सना थकाशिन्ड्या. वानिक इद्दार कोडकुल आन्न मुग्गुर आंड्बीऴ उंडीर. अन्दार्द फेंडली शेशी इचीन्ड्या. फ़ेद्दोन्द वडती फाडी फैन्ड्या. वार इद्दार्द वार मिन्दा सना जेम उंड्या. वडती इडशी फैनुट फेद्डोड सना खचाशी फैन्ड्या.... इद्दार सुखाम ला संसार शेस्तुन्डीर." वार इद्दार्द सुकुम देवून्क सुडाबुदि कालेद आन्केन वडती इड्शी फो".....इळा फाळ्यामोर आन्तुडीर.
बिळाद फेंडली आयिनुट फेद्डोड कडाक निल्चेतोड. फळ्यांमालोनी म्याकाल कादेंक फ़ैयेतोड. अंदाटलोणी दुड्लामिंदा वाड दिनाल तीसतुनड्या. फद्दीना ८ वाग्याळा अन्दारी म्यकाल येत्केन वाड शेरूला आणि शेनला फैयेतोड आंन मापाक ६ वाग्याळा वच्चेतोड. मां इंटल्या रोन्डू म्यकाल आन वागा शिन्या बोकुड उंड्या. मिम पण वान्तुकुडे म्याकाल इडशेतोम. वागा फिर फेद्डोड म्याकाल तुस्कुदेंक फेद्दोड वच्च्या.
मोम्मा वानिक " च्या तागी फो ......." अन्केन शेप्या. " लाग्गाना इ अम्मा ..... इबाद रवा उशीर आईनाद ......" फेद्दोड आन्या .....
" फेद्डोडा च्या आईनाद ...रव्वा थांबाय ....." मा अम्मा
रवा गडफद्तोन अम्मा वानिक च्या इच्या. वाड मेलामेलागा तागीगस म्याकाल येत्केन फो.
धीन्नाम वाड वच्चेतोड आन म्याकाळ तुस्केन फैतोड.
" आये फेद्डोड म्यकाल यक्कड येत्केन फोताड ?" ...नीन अम्माक अडगतीन ...
"शेरूला आन शेनला येत्का फोताड ..... मेशिगस येत्कास्ताड ....." ना अम्मां शेप्या ..
"नाक पण फ़ैयेद उन्दाड ...." नीन आटिन ...
" नु शाळा नेरू अण्णा ....." " फेद्डोड सना फानी शेस्ताड ..... वान बिळ वानतिक सुशेद लेर ......"
" आन्केन फेद्डोड फानी शेस्ताड ........" इला आनिगास ना आम्मा गप्प अय्या .... आणि शेप्पुदेंक आंट्या.......
"फेद्डोड खरेम सना कष्ट्याम शेशी बीळान फद्दावर शेश्या आणि वनीक इर बीळ येम इच्चीर? नाक सना वाईट वाटाशा . इद्दार बीळ वारद वारद फानी शेशिगस कडाक निल्चेतोर. वार फेद्दोनतिक सुडाकुन्डीर. वान बिळा वडतील फेद्दोंक येळा बी मांटलाडेतोर. वाणिक रोट्या सुद्धा तिन्देंक इचेत नेकुन्डेतोर. सना हाल उंड्या वान्द. फेद्दोन वडति आणि फेद्दोड बीळाइचाका इन्ता कष्ट्याम शेशी वानिक एम शिक्या?"
" इदार्द बीळाद फेंडली धूम-धामता शेशी इच्चा ..., मुग्गुर कुतुर्लु फेंडली शेश्या....... इन्ता शेशी वाड इंकाना हार मानाया लेद.........
वान वडती इप्पुड वानसंगा उंटे फेद्दोंक हान्ते आधार औउतुन्ड्या...... वाड वग्गाडे उन्डाड...इंत्ता अय्या तरी फेद्दोड हार मानाया लेकुंड्या. वान्द जिद्द खरेम मानाया बेक.
इबद अन्ता फळ्यांम फेद्दोन वळकास्ताद ...वान जिद्द इचाका... वान कष्ट्याम इचाका... वान बीळान आणि कोडालक अंदार तीट्टतार...... फेद्दोड म्याकाल काशी येळा ना दिनाल तीस्तुन्ड्या.... वान जिद्द नाक इप्पुड पण प्रेरणा इसताद.
........................शं
No comments:
Post a Comment